Rusiyanın şərtləri ilə müharibə bu gün də başa çata bilər. Bu, tam kapitulyasiya və Ukraynanın müstəqil dövlət kimi mövcudluğunu dayandırması olacaq.
Bunu Axar.az-a açıqlamasında ukraynalı ekspert Ənvər Derkaç Zelenskinin 2025-ci ildən gec olmayaraq müharibəni bitirmək istəməsi ilə bağlı son xəbərləri şərh edərkən deyib.
“Lakin Zelenski heç vaxt buna razı olmayacaq - ruslar Kiyevi alsa belə. Ukraynada cəmiyyət belə münasibətlərdə dövlətin yanındadır. Hakimiyyətin hərəkətləri ilə cəmiyyətin gözləntiləri arasında kəskin uyğunsuzluq yaranarsa, hakimiyyət yıxılacaq. Buna görə də Zelenskinin Rusiya ilə kompromis addımları hərbi çevrilişə səbəb ola bilər. Bu, artıq Ukraynanın mövcudluğu üçün real təhlükə olacaq. Müharibə şəraitində belə güclü və qəddar düşmənə uğurla müqavimət göstərmək ancaq cəmiyyət-dövlət birliyini qoruyub saxlamaqla mümkündür”, - o vurğulayıb.
Kiyevin ABŞ-dan təhlükəsizlik zəmanəti və AB-yə daxil olmaq müqabilində ərazilərin itirilməsini tanımadan cəbhə xətti boyunca atəşkəsə hazır olması barədə iddialara münasibət bildirən Derkaç Rusiyanın belə bir kompromisə hazır olmadığını vurğulayıb:
“Bu, əsas maneədir. Qərb də dərin düşüncədədir. Ona görə də müharibə gələn il də davam edəcək, hətta ruslar Dneprə çatsa belə. Ukraynalılar üçün bu müharibə xalq, millət olaraq yaşamaq məsələsidir. Təslim olmaq - mövcudluğu dayandırmaq deməkdir. Ukrayna xalqında həyatı qorumaq instinkti həmişə güclü olub. Əvvəllər bu, istənilən şəraitdə uyğunlaşmaq və yaşamaq qabiliyyətində özünü göstərirdi. İndi dövlətində otuz ildən çox yaşayıb, müharibədə on minlərlə kişi və qadın itirib, təslim olmaq və yenidən işğalçının iradəsinə uyğunlaşmaq ölüm demək olardı. Ukraynada insanların çoxu bunu başa düşür”.шаблоны для dle 11.2