Rusiyada yaşayan azərbaycanlı milyarder İsgəndər Xəlilovun ətrafında dolaşan fırıldaqçılıq ittihamlarının növbəti dalğası başlayıb. Oliqarxın adı ilə bağlı olan “Svit Haus” MMC tərəfindən Bakıda tikintisi dayandırılan binadan mənzil alan daha iki şəxs Yasamal rayon Məhkəməsinə müraciət edib.

Xatırladaq ki, “Svit Haus” MMC Bakının Nərimanov rayonu, Təbriz küçəsində, Heydər Əliyev Mərkəzinin yanında 2010-cu ildə sayca üçüncü çoxmərtəbəli binanın təməlini qoyan kimi oradakı mənzillərin satışına başlayıb. Yaxınlıqda iki bina ucaldan şirkətin rəhbərliyi üçüncü binanın tikilib başa çatmasına təminat kimi tikintinin İsgəndər Xəlilova məxsus olduğunu və “Svit Haus” MMC-nin icraçı katibi və onun təsisçilərindən biri milyarderin elə öz qardaşı, “Bakı Toxucu Tikiş” ASC-nin sədri Cavanşir Xəlilovun olduğunu göstərirdi.

Bunlar öz yerində, məsələnin çox maraqlı təfərrüatları var…

İ.Xəlilovun şirkətini məhkəməyə verənlərdən biri Səadət Əliyevadır. Onun vəkili Sadiq Rəsulov Qaynar.info saytına bildirib ki, S.Əliyeva 2011-ci il sentyabr ayında müqavilə bağlayaraq həmin yaşayış binasının 15-ci mərtəbəsində ümumi sahəsi 90,9 m2 olan 2 otaqlı mənzilə 63.630manat (1 kv. m. 700 manat hesabı ilə) ödəməklə 3 il müddətində təhvil almalı imiş. Müqaviləyə əsasən, alıcı ilkin olaraq avans kimi 19.100 manatı ödəyib, qalan 44.530 manat pulu isə 30 ay ərzində hər ay 1.485 manat ödəməyi öz öhdəsinə götürüb. Bundan başqa, S.Əliyeva həmin binanın alt zirzəmisində yerləşən ümumi sahəsi 21 m2 olan qeyri-yaşayış sahəsini hər 1 m2-in dəyəri 800 manat olmaqla alınması ilə bağlı daha bir müqavilə imzalayır, əvvəlcə 19.100 manat, daha sonra 9 dəfə hər dəfə 1500 manat olmaqla “Svit Haus”  MMC-yə ödəniş edir. Beləliklə, iddiaçı Səadət Əliyeva “Svit Haus”  MMC-yə ümumilikdə 32.600 manat pul ödəyib. Sonra isə tikintinin davam etdirilmədiyini gördükdə, ödənişləri dayandırıb.

Beləliklə, şirkət 2014-cü ilin sentyabr ayında mənzili iddiaçıya təhvil verməli olduğu halda, demək olar ki, tikinti ümumiyyətlə aparılmayıb, müqavilə bağlanan dövrdə aparılmış tikinti işləri olduğu kimi qalıb. Beləliklə, S.Əliyeva məhkəməyə üz tutub…

İ.Xəlilova bağlı olan şirkəti məhkəməyə verən digər şəxs – Emil Yusubov isə “Svit Haus” MMC ilə bağladığı müqaviləyə əsasən inşa ediləcək həmin binanın 14-cü mərtəbəsində yerləşən ümumi sahəsi 149,4 m2 olan 3 otaqlı mənzili ümumi dəyəri olaraq 104.580 manata (1 kv. m. 700 AZN) almaqla bağlı müqavilə bağlayıb və həmin məbləğin 94.380 manatını şirkətə ödəyib.

Lakin araşdırmalar nəticəsində məlum olub ki, “Svit Haus” MMC həmin binanın tikintisini aparılmaq üçün rəsmi dövlət qurumlarından ümumiyyətlə razılıq almayıbmış.

“Beləliklə, aydın olur ki, tikinti işlərini aparmaq üçün hər hansı bir rəsmi icazə almadığı halda bütün alıcıları aldadaraq onların pulunu qanunsuz olaraq mənimsəyib. Lakin keçən müddət ərzində iddiaçılar tikinti ilə bağlı müraciət edən zaman hər dəfə cavabdeh “Svit Haus” MMC-nin rəhbərliyi tərəfindən tikinti işləri aparılmasında hər hansı bir problemin olmadığı və mənzillərlə qarajın tikilərək təhvil veriləcəyi bildirilib” – vəkil Sadiq Rəsulov deyib.

Ən sonda şirkət rəhbərliyi MMC-yə göstərilən ünvanda tikinti işlərinin aparılmasına dövlət tərəfindən icazə verilmədiyini etiraf edib. Ödənilən pula gəlincə, “şirkətin sahibi İsgəndər Xəlilov Bakı şəhərinə gəldikdən sonra pullarınız geri qaytarılacaq” deyilir.

Bir neçə il əvvəl “Milyerderlər ittifaqı” adlanan Rusiya Azərbaycan Təşkilatları İttifaqına qoşulan, hətta adı sensasiyalı məqalələrdə hallanan İ.Xəlilovun isə ölkəyə nə vaxt dönəcəyi açıqlanmır. Əslində, onu məhkəməyə verən S.Əliyeva və E.Yusubov təkcə buna görə qeyri-müəyyənliklə üzləşməyiblər. Bunu onların vəkili deyir: “Optimist olaraq düşünək ki, tikintinin “sahibi” deyilən bu şəxs gəldi və ödənilən pulları geri qaytardı. Həmin məbləğlə hazırda necə bir mənzil almaq olar?  “Svit Haus” MMC hazırda həmin ünvanda inşası başa çatmış binalarda mənzilin 1m2-ni 1400 manata satır, yəni yuxarıda adıçəkilən zərərçəkənlərin müqaviləyə görə göstərilən 700 manatdan 2 (!) dəfə baha. Həmçinin, daşınmaz əmlakın qiymətləndiriciləri tərəfindən məlum olur ki, həmin ərazidə inşa olunan binalarda mənzillərin 1m2-nin dəyəri kateqoriyalarından aslı olaraq 1300-1600 manat məbləğindədir. Yəni, əgər şirkət üzərinə düşən öhləkikləri vaxtında yerinə yetirmiş olsaydı, iddiaçılar da həmin ərazidə istədikləri mənzili və qeyri-yaşayış sahəsini almaq üçün indiki vəziyyətdə əlavə pul sərf etmək məcburiyyətində qalmazdılar, yaxud çoxmərtəbəli yaşayış binasında olan mənzillərini daha baha qiymətə sata bilərdilər. Nəticə etibarı ilə, vətəndaşlar həm əlavə zərərə düşüb, həm əldə edə biləcəkləri gəlirdən məhrum olublar. Göründüyü kimi, hər il daşınmaz əmlak bazarında qiymətlər bahalaşdığı üçün hazırda həmin ərazidə mənzillər müqavilələrdəkilərdən iki dəfə baha qiymətə satılır”.

Vəkil S.Rəsulov bildirib ki, məhkəmə iddiasına əsasən ödənilmiş məbləğlər cavabdeh tərəfindən indiki bazar qiymətinə uyğun olaraq iddiaçılara qaytarılmalıdır. Yəni, “Svit Haus” MMC tərəfindən Emil Yusubova 188.760 manat, Səadət Əliyevaya isə 65.200 manat ödənilməlidir.

Bundan başqa, Yasamal rayon Məhkəməsindən “Svit Haus” MMC-nin rəhbərliyinin hərəkətlərində cinayət tərkibi olduğu üçün mülki işin məhkəmə iclasının sonunda həmin şəxslərin barəsində prokurora xəbər verilməsi barədə xüsusi qərardad çıxarılması da xahiş olunub.

Yeri gəlmişkən, araşdırmalar nəticəsində məlum olub ki, İsgəndər Xəlilov tərəfindən həmin ərazidə ucaldılan ikinci binanın da tikinti üçün lisenziyası mövcud deyil və bu səbəbdən oradan mənzil alan şəxslər nəinki ora köçə bilmir, heç təmir işlərini də apara bilmirlər. Görünən odur ki, Xəlilovların “Svit Haus” (“Şirin ev”) ətrafındakı fırıldaqları onlara çox acı günlər yaşadacaq (qaynar.info).