Millət vəkilləri müvafiq qanunlardakı “ekspertiza” və “ekspertiza rəyləri” sözlərinə etiraz ediblər. Onlar ekspertizaların, ekspertiza rəylərinin çox zaman doğru olmadığını və həqiqəti əks etdirmədiyini, qanunlara inamın azalmasına gətirib-çıxardığını vurğulayıblar.

Mediatv.az-ın  xəbərinə görə, bu məsələyə parlamentin iqtisadi, siyasət, sənaye və sahibkarlıq komitəsinin bu gün keçirilən iclasında millət vəkili Vahid Əhmədov toxunub.

O qeyd edib ki, ekspertizalar və ekspertiza rəyləri boş məsələlərdir:

“Onlar bir çox hallarda həqiqəti əks etdirmirlər, mənasız olurlar”.

Adıçəkilən komitənin sədri, akademik Ziyad Səmədzadə millət vəkilini dəstəkləyib:

“Ekspert qarşısında qoyulan suallar onun xüsusi biliyindən kənara çıxmır. Axı, o biliyi kim müəyyən edir?! Mən elə başa düşürəm ki, bu, qeyri-ciddi məsələdir.

Vahid müəllimin dediyində həqiqət var. “Sənədlər yararsız olduqda və kifayət qədər olmadıqda”, - deyə qanun layihəsində qeyd edilir. Amma bu “kifayət” sözünü aydınlaşdırmalıyıq. Aydınlaşdırmalıyıq ki, o, nə deməkdir, nəyi ehtiva edir?”