Qüdrət Paşayev ittihamlarla bağlı deyib: “Məsələ belədir ki, bu adamlar doğrudan da Gədəbəyin tarixi abidələrini araşdırıb, film çəkmək niyyəti ilə ötən ilin yayında İcra Hakimiyyətində olublar, bu iş üçün maliyyə dəstəyi və digər yardımlar istəyiblər. Lakin onların heç birinin nə tarix elmindən, nə arxeologiyadan, nə də sənədli film çəkilişindən xəbərləri yoxdur. İcra Hakimiyyətində onların nəzərinə çatdırılıb ki, bu cür işləri peşəkarlar, yəni tarixçilər, peşəkar araşdırmaçılar, arxeoloqlar görməlidir. Gədəbəyin tarixi, tarix-mədəniyyət abidələri haqda tarix elmindən xəbəri olmayanların film çəkmək təşəbbüsünə dəstək verə bilmərik. Üstəlik, rayon İcra Hakimiyyətinin büdcəsində bu kimi işləri maliyyələşdirmək üçün vəsait nəzərdə tutulmur. İndi bu şəxs gedib, rayonun icra hakimiyyəti başçısını “ideya oğurluğunda” ittiham edir. Mən həmin Dövlət Məmmədova bir-iki sual verdim və gördüm ki, bu adamın tarix elmi haqda savadı hansı səviyyədədir. Gədəbəyin 3500 illiyi ilə bağlı keçirilən tədbirin bu adamların ideyasına nə dəxli var? Bu tədbir əvvəlcədən nəzərdə tutulmuşdu və alimlərin, ziyalıların iştirakı ilə keçirildi”.