Azərbaycan Beynəlxalq Bankının (ABB) xarici öhdəliklərinin könüllü restrukturizasiyası ilə bağlı proqramın qəbulundan sonra xarici kredtorların xeyrinə 2,4 mlrd. dollar dəyərində orta və uzunmüddətli dövlət istiqrazları buraxılacaq. Bu, xarici borcu artırsa da, Azərbaycanın beynəlxalq kredit reytinqinə mənfi təsir göstərməyəcək.

Mediatv.az Report-a istinadən bildirir ki, bunu maliyyə naziri Samir Şərifov 2017-ci il dövlət büdcəsinə dəyişikliyin parlamentin bugünkü plenar iclasında müzakirəsi zamanı bildirib.

Qeyd edək ki, səsvermənin nəticələri 18 iyul 2017-ci il tarixində nəzərdə tutulmuş Kreditorların Yığıncağında məlum olacaq.

Nazir qeyd edib ki, Fonda ayrılan vəsait nəticəsində Əmanətlərin Sığortalanması Fondunun eyni məqsədə cəlb etdiyi kreditlərin bağlanması təmin ediləcək. Dəyişiklik əsasən bank sektorunun sağlamlaşdırılması, əmanətçilərin hüquqlarının qorunması istiqamətində işlərlə bağlıdır. Xərclərin strukturunda dəyişiklik birbaşa və dolayısı ilə əhalinin maddi rifahına xidmət edir.