2016-cı ilin yanvar-iyul aylarında neft sektoruna 5 152,1 mln. manatlıq vəsait yönəldilib.

Mediatv.az xəbər verir ki, bu barədə "Report"a Dövlət Statistika Komitəsindən məlumat verilib. 

Komitədən bildirilib ki, bu da ötən ilin eyni dövrü ilə müqayisədə 24,9% artım deməkdir.

Qeyri-neft sektorunun inkişafına sərf edilən 2807,6 mln. manatlıq vəsaitin 276,0 milyon manatı və ya ümumi sərmayənin 3,5%-i qeyri-neft sənayesi sektorunda istifadə edilib. Qeyri-neft sektoruna investisiyalarda ötən ilin eyni dövrü ilə müqayisədə 46,5% azalma qeydə alınıb.

Məlumata görə, 2016-cı ilin yanvar-iyul aylarında ölkənin iqtisadi və sosial sahələrinin inkişafı üçün bütün maliyyə mənbələrindən əsas kapitala 7 959,7 mln. manat vəsait yönəldilib, onun 6 460,4 mln. manatı və ya 81,1%-i məhsul istehsalı obyektlərinin, 1 175,9 mln. manatı və ya 14,8%-i xidmət sahələri üzrə obyektlərin, 323,4 mln. manatı və ya 4,1%-i isə ümumi sahəsi 888,7 min kvadrat metr olan yaşayış evlərinin tikintisinə sərf olunub.

Ümumi sərmayənin 27,7%-i dövlət, 72,3%-i qeyri-dövlət sektorunun sərmayədarlarının payına düşüb.

Daxili mənbələrdən əsas kapitala yönəldilmiş vəsaitin dəyəri ümumi sərmayənin 38,1%-ini təşkil edib.