Avropa.info-nun əl-Ərabiyyə kanalına istinadən verdiyi xəbərdə bildirilir ki, bu gün Tunis televiziyası vasitəsi ilə 21 dekabrda keçirilən prezident seçkilərində qələbə çaldığını açıqlayan 88 yaşlı əs-Sibsi xalqı ancaq gələcəyə doğru baxmağa və ölkənin gələcəyi üçün doğru qərarlar qəbul etməyə səsləyib. 

Ümumi səslərin 55,6 faizini toplayan əs-Sibsi onu bu vəzifəyə layiq görənlərə öz dərin təşəkkürünü bildirib. 

O həmçinin sabiq prezident Monsef əl-Mərzuqinin ona zəng edərək təbrik etdiyini söyləyib. 

Tunis Ali Seçki Komissiyası rəhbəri Şövfiq Sarsar keçirdiyi mətbuat konfransında seçkilərin ikinci turunda Nida Tunis Partiyası rəhbəri əs-Sibsinin 55,68 % səslə birinci, sabiq prezident Monsef əl-Mərzuqinin isə 44,32 % səslə ikinci yeri bölüşdüyünü bildirib. 

Məlumat üçün bildirək ki , 88 yaşlı əs-Sibsi parlamentin sədri vəzifəsindən uzaqlaşdırılaraq 1991-ci ildə mühacirətə göndərilmiş və siyasi həyatdan uzaqlaşmışdı. 14 yanvar 2011-ci il inqilabından sonra ölkəyə qayıdan əs-Sibsi yenidən siyasi həyata atılmışdı.