Bakı Slavyan Universitetində (BSU) birinci turda tələbə adını qazanan abituriyentlərin qeydiyyatı artıq yekunlaşıb. Nəticələr göstərir ki, bu il BSU-nu seçən tələbələrin sayı xeyli artıb. 2018-2019-cu tədris ili üçün universitetə 1085 tələbənin qəbulu nəzərdə tutulmuşdu. Birinci turda bakalavriat pilləsinə qəbul olan tələbələrin artıq 978 nəfəri qeydiyyatdan keçib. Bu isə, plan üzrə qəbulun 90 faizindən artıq deməkdir. Sənəd qəbulu üzrə komissiyanın məsul katibi, dosent Nəsib Cəbrayılov ikinci turda universitetə qəbul olan tələbələrin qeydiyyatının davam etdiyini vurğulayıb.

Qeyd edək ki, BSU-nu seçən tələbələr arasında 72 nəfər 500-dən yuxarı bal toplayıb. Bir tələbə isə 622 bal toplayıb. Xarici dil müəllimliyi (ingilis dili üzrə), Tərcümə (ingilis dili üzrə), İbtidai sinif müəllimliyi, Azərbaycan dili və ədəbiyyatı müəllimliyi ixtisasını seçənlər üstünlük təşkil edir və bal həddi onlarda daha yüksəkdir.