Azərbaycan Beynəlxalq Bankından sonra Qazaxıstanın ikinci böyük bankı da borcunu ödəməyə bilər.

Mediatv.az “Marja”ya istinadən xəbər verir ki, bu barədə “Bloomberg” agentliyi məlumat verib.

“Bloomberg” yazır ki, borcunu qaytara bilməyən və restrukturizasiya proqramı çərçivəsində borcunun 20%-nin silinməsi üçün çalışan Azərbaycan Beynəlxalq Bankının bu ağır halı “domino” təsiri ilə Qazaxıstanın “Kazkommertsbank”a da “sıçrayıb”.

Azərbaycan Beynəlxalq Bankı 3,3 milyard dollarlıq xarici borcunu ödəyə bilmədiyi günlərdə, “Kazkommertsbank”ın borcu 3,8 milyard dollara çatıb. Qazaxıstan bankının 2018-ci ildə 300 milyon dollar, 2022-dədə 750 milyon dollarlıq borc ödəməsi də var.

“Bloomberg” buna səbəb kimi son iki ildə dünya bazarında neftin qiymətlərinin 50% aşağı düşməsini göstərib. 

Dövlət başçısı Nursultan Nazarbayev noyabr ayında etdiyi bir açıqlamada bankın çökməsinə icazə verməyəcəklərini açıqlayıb. 

Xatırladaq ki, “Kazkommertsbank” Qazaxıstan hökumətindən də 7,7 milyard dollar borc alıb.