“Holcim (Azerbaijan)” ASC-nin aktivləri bu il yanvarın 1-nə 342 mln. 561 min manat təşkil edib.

Mediatv.az-ın məlumatına görə, “Report” şirkətin maliyyə hesabatına istinadən xəbər verir ki, bu, ötən ilin yanvarın 1-i ilə müqayisədə 5,6% azdır.

Ötən il “Holcim (Azerbaijan)”ın cəmi kapitalı 18,2% azalaraq 121 mln. 169 min manat, cəmi öhdəlikləri isə 3,8% azalaraq 41 mln.188 min manata düşüb.

2016-cı ildə şirkətin gəlirləri 77 mln. 955 min manat (2015-ci ilə nisbətən 7,9% az), xərcləri isə 111 mln. 203 min manat (46,5% az) təşkil edib. 

Son nəticədə sement istehsalçısının vergidən əvvəlki zərəri 33 mln. 248 min manat olub ki, bu da illik müqayisədə 73% azdır.

“Holcim (Azerbaijan)” mənfəət vergisi xərclərinə 6 mln. 24 min manat qənaət edib və ötən ili 27 mln. 8 min manat xalis zərərlə başa vurub.

Xatırladaq ki, “Holcim (Azerbaijan)” 2000-ci ildə yaradılıb və Azərbaycanın ən iri sement istehsalçısıdır. Onun nizamnamə kapitalı 31 mln. 813 min manatdır. Şirkətin səhmlərinin 76%-i İsveçrənin “Lafarge Holcim” və “Holcim Auslandbeteiligungs GmbH.” şirkətlərinə (müvafiq olaraq 66% və 10%), 10%-i Avropa Yenidənqurma və İnkişaf Bankına, 14%-i isə fiziki şəxslərə məxsusdur.