Rusiyanın Federal Təhlükəsizlik Xidmətinin Moskva bölməsi üzrə əməliyyatçısı Petr Koryuqin, Daxili İşlər Nazirliyinin Lyublino rayonu üzrə bölməsinin cinayət axtarış idarəsi üzrə rəisi Pavel Filatov və həmin bölmənin əməkdaşı Pavel Drozdov Azərbaycan əsilli Yusif Xalilayevin avtomobilinə narkotik maddə atmaqda ittiham olunub. 

Mediatv.az “Kommersant”a istinadla xəbər verir ki, cinayət hadisəsi 2017-ci ilin yazında baş verib.

Həmin vaxt paytaxtın “Sadovod” bazarında işləyən azərbaycanlı Rəşad Əsədov həmin bazarda çalışan həmyerlisi Xalilayevdən intiqam almaq qərarına gəlib. 

Koryuqinin hazırladığı plana əsasən, satıcının rəfiqəsi Yanina Helyabovskaya Xalilayevin avtomobilinə narkotik atmalı, Filatov və Drozdov isə onu saxlamalı idilər. Plan işə yarayıb, ancaq Xalilayev polislərə “azadlığa çıxması” üçün tələb olunan iki milyon rubldan yalnız 500 min rubl verə bilib. Azadlığa buraxıldıqdan sonra iş adamı şəxsi təhlükəsizliyi üçün Moskva DİN-in baş idarəsinə müraciət edib. 

Tezliklə cinayət hadisəsinin bütün iştirakçıları həbs edilib. Onlara və cinayətkar qruplaşmanın digər üzvlərinə qarşı rüşvət alma, dələduzluq, vəzifədən sui-istifadə maddələri ilə ittiham irəli sürülüb.