Ermənistan Moskvanın ağuşunda nəyə ümid edir?

Ana səhifə Bizimlə əlaqə

Ucarın icra başçısı Mənsur Məmmədovun “Avtoyoltikintiservis” MMC ilə iş birliyi

Abdin Fərzəliyev Xırdalanda qanunsuz tikintiyə necə icazə verib? -DE-FAKTO

Mədəniyyət Nazirliyində nə baş verir?

Siyəzəni abadlaşdıracaq "Safari": Keçmiş nazirin oğlunu şirkətlə nə bağlayır?

Bakıda SSRİ bayrağı qaldıran İbrahim Əsədli kimdir? - VİDEO

“Binəqədi Park” MMC-dən vətəndaşlar şikayət edir:Vergidən belə yayınıb-VİDEO

Həsənovun 7 aylıq xərci: 22 milyon... - İcazə verin şübhələnək...

Gəncə Dövlət Universitetində özbaşınalıqlara son qoyulsun!

Leyla Əliyeva Qaradağda yeni parkın açılışında - Fotolar

Dünya (13-08-2021, 10:12)
Ermənistan Moskvanın ağuşunda nəyə ümid edir?

Ermənistan yenidən Rusiyanın ağuşuna qayıdaraq həm regionda, həm də Qarabağda gərginliyi artırmaqdadır. Təcavüzkar ölkənin yeni müdafiə naziri Moskvada yatır, hər gün səsi Rusiya paytaxtından gəlir.

Kreml isə Ermənistanın müharibədən sonra “burcudub və naz edib” yenidən öz ənənəvi yerinə qayıtmasına çox şaddır və bunu büruzə verməkdən sanki məmnundur da. Son olaraq müdafiə naziri Sergey Şoyqu Ermənistanı “Zaqafqaziyada təhlükəsizliyin təmin edilməsində Moskvanın müttəfiqi və əsas tərəfdaşı” adlandırıb. Şoyqu Arşak Karapetyanı Moskvada Ermənistanın müdafiə naziri rütbəsində qarşılayaraq bildirib ki, Moskva Ermənistan silahlı qüvvələrinin modernləşdirilməsi prosesinə töhfə verməyə hazırdır. “Biz həm ikitərəfli formatda, həm də KTMT çərçivəsində hərbi sahədə əməkdaşlığımızın inkişafına böyük əhəmiyyət veririk. Eyni zamanda silahlı qüvvələrinizin islahat proqramının həyata keçirilməsinə kömək etməyə hazırıq”, - Şoyqu bildirib.

O qeyd edib ki, Ermənistanda yerləşən 102-ci Rusiya hərbi bazası yaxşı təchiz olunub və respublikanın təhlükəsizlik qarantı sayılır. Karapetyan da Şoyqunun könlünü şad edən sözlər deyib, Rusiyanı “erməni xalqının təhlükəsizlik problemləri ilə məşğul olan yeganə dövlət” adlandırıb.

Rusiyanın Ermənistana verə biləcəyi “töhfə” aydındır, bəs Ermənistan bu yeni izdivacdan nə güdür? Zaqafqaziyada Rusiyanın “oyuncağı” olmağa razılaşan hansı illüziyalar qurur? Şuşa ətrafında yenidən postlar qurması nəyə işarədir?

Beynəlxalq əlaqələr üzrə ekspert Elşən Mustafayev hesab edir ki, Paşinyan iqtidarı Qərbə tərəf üz tutma görüntüsü yaratsa da, yaxın perspektivdə Rusiyadan əl çəkməyəcək: “Paşinyan başda olmaqla, Ermənistanın müxtəlif məmurlarının, o cümlədən müdafiə nazirinin Moskvaya mütəmadi səfərlərinin məqsədləri hazırkı situasiyada Rusiyanı onların yanında olmağa inandırmaqdır. İlk növbədə üçtərəfli sazişə qarant olan Rusiyanı bu sazişin bəndlərinin Ermənistanın maraqlarına uyğun həyata keçməsinə razı salmaqdır. Həmçinin sərhədlərin demarkasiya və delimitasiyası, Qarabağın erməni nəzarətində qalmış ərazilərində öz təhlükəsizliklərini rusların köməyi ilə gücləndirməsi, Hadrutu qaytarmaq, işğaldan azad edilmiş Kəlbəcər və Şuşada infrastrukturun bərpasına mane olmaq və s. əsas hədəflərdir. Həmişə olduğu kimi, Kreml Cənubi Qafqazda intriqalar qurmaq adətindən əl çəkmədiyi üçün bu istiqamətdə Ermənistandan istifadə etməyi planlaşdırmağı düşünür. Əslində isə hesab edirəm ki, hazırkı vəziyyətdə daha çox Ermənistan Rusiyadan istifadə etməyə çalışır. Rusiya hər zamankı kimi yanlış addımları ilə bir daha sübut edir ki, bu gün düşdüyü problemlərin əsas səbəbi məhz SSRİ dağılandan sonra apardığı ağılsız və məntiqsiz siyasətləri olub. Proseslər Ermənistanın Moskvanın ağuşuna oturmaq görüntüsü yaratsa da əslində bunun belə olmadığını düşünürəm. Sadəcə, rəsmi İrəvan Rusiyadan problemlərini çözmək üçün maksimum yararlanmaq istəyir. Bununla belə, Ermənistan əhalisinin böyük əksəriyyəti yenə də Rusiyaya nifrət edir, Paşinyan və yeni komandası xarici siyasətində əvvəlki kimi Qərbə üstünlük verir, amma yaxın perspektivdə Rusiyadan birdəfəlik uzaqlaşmaq siyasətindən əl çəkilməyib. Ona görə də hər iki dövlətin bir-birilərinə sözlərlə jest etmələrini, özlərini yaxın göstərmələrini səmimi qəbul etmirəm. Eyni zamanda Azərbaycan üçün təhlükə hesab edirəm. Çünki belə görünür ki, hər iki tərəf bir-birilərini nə qədər həzm etməsələr də Azərbaycanla bağlı sabah istənilən addımı atmağa cəhd edə bilərlər. Təbii ki, Azərbaycan proseslərin öz əleyhinə inkişaf etməsinin qarşısını almaq üçün kəskin şəkildə mövqeyini ortaya qoymalıdır. Hazırda bütün əlaqələrdən istifadə etməklə müttəfiqlik etdiyimiz, yaxın münasibətlərdə olduğumuz dövlətlərlə hərbi-siyasi əməkdaşlığımız barədə işlər görülməlidir. Xüsusilə Türkiyə və Pakistanla üst qatda olan belə əlaqələrin daha da gücləndirilməsi vacibdir”.

Siyasi şərhçi Azər Hüseynov Azərbaycanın yeganə yolundan danışdı: “Ermənistan hərbi sistemində rusların adamları çoxdur. Ordu ilə siyasi hakimiyyət mehriban düşməndir. Qərb erməni siyasi hakimiyyəti ilə, ruslar isə ordu ilə işləməyi önəmli sayır. Ona görə də ruslar ordu ilə bizi təhdid etmək istəyirlər. Daha doğrusu, hakimiyyətdəki bir klan. Avropa və Amerika isə özünü Paşinyanın hamisi sayır. Bizim yeganə yolumuz Türkiyə ilə bir bədən, bir ürək olmaqdır. Ermənilər bu dəfə nəsə edərsə, sərhəddəki əsas şəhərləri tutmalıyıq. Məsələn, Qafanı. Ruslar nə edə bilər? Erməni siyasi hakimiyyəti ilə ordusu arasında düşmənçiliyin artması marağımızdadır”. “Rusiyanın mövqeyi təəccüb və təəssüf doğurur. Diqqət edin, «sülhməramlı» adı altında torpaqlarımıza yeridilmiş Rusiya ordusunun «başçısı» erməni nazirə ürək-dirək verir və onu əmin edir ki, ölkəsi Ermənistana ordunu möhkəmlətməkdə (yenidən qurmaq, silahlandırmaq, ərzaq və digər lazımi ləvazimatlarla təchiz etmək və başlıcası isə Azərbaycanın qəzəbindən qorumaq) köməyini əsirgəməyəcək”,- deyə, azpolitika.info saytı yazır. “Sual yaranır: Ermənistan darmadağın olmuş ordusunu hansı məqsədlə və hansı vəsait hesabına yenidən qurmağa can atır - bir tərəfdən, digər tərəfdən isə Rusiya və Qərb imperialistləri hansı məqsədlə parazit həyatı sürən, onun-bunun qucağına qısılan erməniyə ordunu bərpa etməkdə yardımçı olur? Axı Fransa da, ABŞ da guya dünyada terrorçuluqla mübarizə aparır. Ermənistan isə təpədən-dırnağa qədər terror bataqlığına yuvarlanıb - bu işdə ona kömək etmək, terrora nəfəs vermək demək deyimi?

Rusiya bir halda özünü «sülhməramlı» adlandırır, digər halda isə təcavüzkar Ermənistanın məğlub ordusunu yenidən qurur, onu silahlandırır və əl altından Ermənistan hakimiyyətini üçtərəfli bəyanatın müddəalarını yerinə yetirməməyə təhrik edir. Bütün bunlar bir daha göstərir ki, nə erməniyə, nə Rusiyaya, nə də «demokratik» Qərbə heç vəchlə inanmaq olmaz və nə qədər rəqabət aparsalar da, erməni məsələsində onların hamısı lazımi anda anti-türk mövqedən çıxış etməyi bacarır",- deyə müəllif bildirir.
“Yeni Müsavat”