Qazaxıstanın Aktobe şəhərində baş vermiş terror aktında ölənlərin sayı 17 nəfərə çatıb.

Mediatv.az  “İnterfaks”a istinadən xəbər verir ki, bunu Daxili İşlər Nazirliyinin rəsmisi Almas Sadubayev deyib. Onun sözlərinə görə, ölənlərdən üçü yerli sakin, üçü hərbçi, 11 nəfər isə terrorçudur. 

O, əlavə edib ki, hazırda qaçıb gizlənən bir neçə cinayətkarın tutulması istiqamətində əməliyyat aparılır: `Aktoba şəhərində "antiterror əməliyyatı rejimi" elan olunub`- deyə, əlavə edib. 

Hadisənin təfərrüatlarına gəlincə isə o bildirib ki, naməlum silahlı şəxslər şəhərdə iki silah mağazasına, eləcə də Milli Qvardiyanın hərbi hissəsinə hücum ediblər. 

Belə ki, silah mağazasına hücum edən terrorçular satıcını öldürüb və bir mühafizəçini güllələyib, digərini isə yaralayıblar. Mağazaya hücum edənlər müxtəlif silahlar götürüblər. Bundan sonra ekstremistlərin bir hissəsi digər silah mağazasına hücum edib və nəticədə bir müştəri öldürülüb. 

Digər ekstremistlər avtobusla Milli Qvardiyaya məxsus hərbi hissənin əsas giriş qapısını sınıdırblar. Nəticədə hərbi hissənin içində atışma olub. Atışma zamanı 3 hərbçi ölüb.