30 oktyabr 2018-ci il tarixində Qazaxıstanın Çimkənd şəhərində yerləşən Avrasiya Texnologiya Universiteti nəzdindəfəaliyyət göstərən Beynəlxalq Fəlsəfə Məktəbinin şagirdləri “Dünyanın dahi filosofları” layihəsi çərçivəsində AMEA-nın Məhəmməd Füzuli adına Əlyazmalar İnstitutunda olublar.

Onlar institutun elmi işlər üzrə direktor müavinləri, filologiya üzrə elmlər doktoru Aybəniz Əliyeva-Kəngərli və filologiya üzrə elmlər doktoru Paşa Kərimovla görüşblər. Paşa Kərimov şagirdlərə və onları müşayət edən müəllimlərə Əlyazmalar İnstitutunda qorunan yazılı abidələr, onların mühafizəsi, bərpası, tədqiqi və nəşrə hazırlanması işi barədə geniş məlumat verib.

Daha sonra şagirdlər Əlyazmalar İnstitutunun ekspozisiya zalında olublar. Burada “Beynəlxalq əlaqələr” şöbəsinin əməkdaşı Aysel Atakişiyeva onlara Əlyazmalar İnstitutun, institutun yerləşdiyi binanın tarixi haqqında geniş bilgi verib.

Şagirdlərlə görüşən İnstitutun elmi katibi, filologiya üzrə fəlsəfə doktoru, dosent Əzizağa Nəcəfzadə qonaqlara Əlyazmalar İnstitutunda mühafizə olunan Şərq mütəfəkkirlərinin ən mühüm əsərlərinin əlyazmaları haqqında danışıb.

Sonda qrup rəhbərləri Aruna Koybakova və QullazatRustembekova ekspozisiya zalının xatirə kitabına ürək sözlərini yazıblar.