Son günlər paytaxtın müxtəlif küçələrində velosipedlə dolaşan şəxslər yol kənarında dayanmış avtomobilləri qarət edirlər. Onlar soyğun üçün uyğun şərait seçirlər və avtomobillərə yaxınlaşıb onların şüşələrini daşla sındırıb içindəki bahalı əşyaları götürərək hadisə yerindən qaçırlar. Belə hadisələrdən biri də paytaxtın Teymur Əliyev küçəsində qeydə alınıb. Belə ki, bir neçə velosipedli şəxs yolun kənarında dayanmış "Nissan Patrol" markalı 90 DD 100 dövlət nömrə nişanlı avtomobili soyublar. 

Həmin vaxt ərazidə olan şahidlərin "Qafqazinfo"ya verdikləri məlumata görə, sözügedən maşının şüşəsini daşla sındıran bir neçə şəxs oradan pul və qadın əl çantası götürərək qaçıblar. Avtomobilin sahibləri hadisə yerinə gəldikdən sonra məlum olub ki, soyğunçular bahalı qol saatı, təxminən 10 min manat dəyərində pul və bahalı əl çantası götürüblər. 

Hadisə haqda polisə məlumat verilib və polis araşdırmalara başlayıb.