Bu gün Azərbaycan ərazisi olan Şuşanın işğalından 26 il ötür. Neçə illərdir ki, ATƏT-in Minsk qrupu münaqişənin sülh yolu ilə həllinə çalışır. Amma heç bir nəticə əldə olunmur. Mən başa düşə bilmirəm ki, işğalçı məlum ola-ola niyə münaqişənin həllini uzatmaq istəyirlər?

Mediatv.az-ın məlumatına görə, bunu şəhid Şirin Mirzəyevin həyat yoldaşı, Xankəndinin millət vəkili olan Flora Qasımova Bakıda keçirilən Avropa İttifaqı-Azərbaycan Parlament Əməkdaşlıq Komitəsinin 15-ci iclasının ikinci sessiyasında deyib. 

Deputat bildirib ki, cinayətkar Ermənistan rəhbərliyi və separatçı rejim işğal altında olan Azərbaycan torpaqlarında qanunsuz məskunlaşma aparır.

“Necə olur ki, Azərbaycanda bir insanın haqqı tapdalanan kimi Avropa təşkilatları xəbər tutur, amma işğalçı bəlli olduğu halda, bu münaqişənin həlli istiqamətində addım atılmır?”

F. Qasımova deyib ki, Ermənistan-Azərbaycan münaqişəsinin həllinin iki yolu var: sülh və müharibə. 

“Mən qadınam, amma müharibə istəmirəm. Çünki müharibə nəticəsində insanlar həyatını itirir. Niyə 20 ildən çoxdur ki, münaqişənin həlli istiqamətində hər hansı bir addım atılmır? Bizdə belə bir məsəl var: “iştah diş altındadır”. Onlar Azərbaycanın işğal altında olan ərazilərindəki abidələri özəlləşdirirlər, qəbirləri dağıdırlar. Bu, insanlığa yaraşan sifətdirmi?

Siz bu söhbətləri çox eşidirsiniz. Bəlkə də, öyrəşmisiniz. Bu gün Ermənistan əsgərlərinin anası deyir ki, niyə mənim oğlu başqa ölkənin ərazisində şəhid olur?! Siz əgər sülh istəyirsinizsə, əlinizi qaldırın. İşğal nəticəsində bizə 100 milyardlarla ziyan dəyib. Ən çox da mənəvi ziyan dəyir.

İnsanlar, qaçqın-məcburi köçkünlər məndən soruşur ki, Flora xanım, İkinci Dünya Müharibəsi cəmi altı il davam etdi, amma Qarabağ münaqişəsi 30 ildir ki, davam edir, biz nə vaxt bəs öz torpaqlarımıza, dədə-baba yurdlarımıza dönəcəyik, işğala nə vaxt son qoyulacaq, ermənilər nə vaxt ərazilərimizi tərk edəcəklər? Onların suallarına cavab yoxdur, cavab verə bilmirik...”

Sonra F. Qasımova göz yaşlarını saxlaya bilməyib.

Avropa Parlamentinin vitse-prezidenti Heidi Hautala F. Qasımovaya cavabında bildirib ki, onun hisslərini, nələr keçirdiyini yaxşı başa düşür:

“Mən sizi yaxşı başa düşürəm, hisslərinizi anlayıram. Bu hisslər mənə də tanışdır, mənə də yad deyil. Mən, əslində, bu hissləri yaşayan insanam. Mənim valideynlərimi də İkinci Dünya Müharibəsi zamanı öz doğma yurdlarından zorla çıxarmış, qaçqın vəziyyətinə salmışdılar.

Ona görə hesab edirəm ki, münaqişənin həll yolu var, bu yol da sülhdür. Biz bu istiqamətdə səylərimizi əsirgəməliyik, davam etdirməliyik”.